വ്രീളാലോലവിലോചനേ വിധുമുഖീ ,
വെണ്മുത്തു രത്നാംബര-
ച്ചേലോ, ചേലിലണിഞ്ഞു നിന് ചൊടിയിലായ്
തഞ്ചുന്നൊളിത്തെല്ലിലോ
ആളും കാന്തി? കടഞ്ഞെടുത്ത കവിതേ,
കാംക്ഷിപ്പു നിന് ലാളനാ-
മേളം ചുണ്ടിലുണര്ത്തിടുന്ന സുഖദ-
ത്തേനുണ്ടു വണ്ടായിടാന് !!
****
ചെഞ്ചുണ്ടില്ച്ചെറു മന്ദഹാസ സുഖദം,
സമ്മോഹനം മാറിടം
പൂഞ്ചായല്, ദ്യുതിയഞ്ചിടുന്ന മകുടം
മാണിയ്ക്ക രത്നാഞ്ചിതം
നെഞ്ചില്ക്കൊഞ്ചിയ രാധയും മുരളിയില്
രാഗാദ്രഭാവങ്ങളും
തഞ്ചും നന്ദകുമാര നിന് നിഴലിലും
സൌന്ദര്യ,മെന്തത്ഭുതം !
***
ക്ഷിപ്രം വന്നു തടുത്തു, വില്ലിതൊടിയും
മട്ടില് വലിച്ചേറ്റിയ-
ഞ്ചസ്ത്രം തീര്ത്തു തൊടുത്തു കര്ണ്ണനുടനേ
തെറ്റാതെ ലക്ഷ്യത്തിലായ്
ചിത്രം! കൊണ്ടതുടഞ്ഞു വീണിതവിടെ,-
ക്കത്തുന്ന ധാര്ഷ്ട്യത്തിനാല്
ചിത്തം ചീര്ത്തു പഴുത്തളിഞ്ഞു കപടം
ക്ഷാത്രം മരിയ്ക്കുന്നുവോ?
Sunday, July 4, 2010
Subscribe to:
Post Comments (Atom)
No comments:
Post a Comment